Sa Kasaysayan Karon:Agosto 3

Aglipayan Church

1902— Gitukod sa aktibistang pari nga si Padre Gregorio Aglipay ang Iglesia Filipina Independencia o Aglipayan Church ning petsaha sa tuig 1902. Atol sa paglihok sa Katipunan niadtong 1898 gihangyo ni Archbishop Bernardino Nozaleda si Aglipay nga komprontasehon ang mga lider sa rebolusyon nga sila si Andres Bonifacio ug Emilio Aguinaldo aron sila awhagong ihunong ang rebolusyon ug hatagan og awtonomiya ang Pilipinas. Apan giagni hinuon ni Aguinaldo si Aglipay nga mokuyog sa rebolusyon. Atol sa Philippine-American War midapig si Aglipay sa mga rebolusyonaryo ug natudlong Military Vicar General. Apan dihang gihangyo ni Aglipay ang mga parokya nga mohangyo sa Vatican nga hatagan og posisyon ang mga Filipinong kaparian wala kini ikalipay sa Vatican ug gimando ni Nozaleda nga isalikway si Aglipay gikan sa Romano Katoliko. Tungod niini natukod ang Iglesia Filipina Independencia.

“Kiss of Life”

2003— Namatay ang Austrian-American physician nga si Peter Safar kinsa maoy mipaila sa manluluwas nga ‘mouth-to-mouth resuscitation nga unang gitawag kaniadto nga “Kiss of Life” sanglit susama kini tan-awon og naghawok ang pasyente ug ang rescuer. Niadtong 1960s napalambo pa ang maong teknik pinaagi sa pagdugang og pagbomba sa dughan aron mabalik og pitik ang kasingkasing sa pasyente nga gitawag karong cardio-pulmonary resuscitation (CPR). Si Safar maoy usa sa mitukod sa World Association for Disaster and Emergency Medicine niadtong 1976. Hinuon ang mouth-to-mouth resuscitation nahisgutan sa Bibliya apan giingong niadto lang 1950 kini subling nadiskubrehang epektibo ni Safar.

Unang pagsuong ilawom sa North Pole

1958— Sa unang higayon, nakasuong ang tawo sa ilawom sa dagkong mga icebergs sa North Pole. Apan kini nahimo lang pinaagi sa submarinong USS Nautilus (SSN571) sa Estados Unidos. Sa unang mga pagsuway napakyas ang USS Nautilus tungod sa dili maayong panahon ug ang pagsige og irog sa mga ice. Walay submarinong makasuong sa ilawom kung dili kini nuclear powered tungod kay wala na magkinahanglang motubil pa og krudo.