Kusinero gitusak sa bala

CEBU, Philippines - Nabuslot ang ulo ug natusak sa bala ang bukobuko ug dughan sa usa ka kusinero nga girapido sa mga bala sa armas sa usa ka killer nga nagsul-ob og full-face ug tainted nga helmet didto sa sitio Lupa, barangay Maguikay, dakbayan sa Mandaue sa miaging kaadlawon.

Ang biktima mao si Juan Aguilar Jr., 23 anyos, ulitawo nga lumad nga taga dakbayan sa Danao, kusinero ug temporaryong nagpuyo sa maong dapit.

Ang nagpusil usa sa duha ka wala hiilhing mga lalaki   nga nagsakay og XRM nga   motorsiklo nga pulos nagsul-ob og close type ug tainted nga helmet.

Matud pa ni SPO2 Reneria Patillas sa kapolisan sa Presinto 4 sa barangay Casuntingan sa maong dakbayan nga ang nag-angkas    maoy mirapido pagpusil   sa biktima.

Si SPO2 Patillas miingon nga wala makabantay ang biktima kay nagluto kini og sud-an para sa ilang carenderia dihang hilom nga gisulod sa kriminal ug kalit kining   gipaarakan sa .45 kalibre nga pistola.

Nahagba ang biktima sa sawog sa ilang kusina kansang ulo nabuslot ingon man ang   buko-buko ug dughan niini natusak usab sa mga bala nga maoy hinungdan sa hinanali niyang kamatayon.

Dihang nasuta nga wala nay kinabuhi ang biktima n ga naglunang sa kaugalingon niyang dugo kalma ra kaayong mibalik og sakay ang criminal sa motor nga nagpaabot niini dili layo sa namatyan sa biktima.

Dugang pa ni SPO2 Patillas nga ang mga sakop sa pamilya sa biktima nga nakalitan wala makalihok ug wala makakuha sa numero sa plaka sa motorsiklo nga gisakyan sa kriminal.

Gidali og hatud sa pamilya ang biktima ngadto sa Mandaue City Hospital diin didto kini ideklarar nga dead on arrival.

Matud pa ni SPO2 Patillas nga naglisod sa pag-ila sa suspetsado ang pipila ka mga sakop sa pamilya nga nakakita sa maong pagpamusil tungod sa helmet nga nagtabon sa ulo sa mga mamumuno niini.

Padayon usab nila karong giimbistigar ang maong kaso aron masuta ang hinungdan sa maong pagpamusil.

Nasuta ni SPO2 Patillas nga grabi ang kasuko sa kriminal sa suspetsado sumala sa makita sa paagi sa pagpusil niini.

Ang kapolisan sa rehiyon nagkanayon nga gisuportahan nila ang DTI sa pagpili sa kalidad sa helmet nga ipasul-ob sa mga motorista.

Apan alang sa kapolisan nga kutob ra sa kalig-on sa kalidad sa helmet ang gipangita sa taga DTI, kanilang mga polis   ang kalig-on ug ang seguridad sa publiko maoy ilang gitan-aw sa matang sa helmet nga ipasul-ob sa mga motorista nunot niining pagpatuman sa helmet law.

Si PSupt. Audie Villacin, Chief sa Regional Intelligence Division sa Police Regional Office (PRO)7 nagkanayon nga mo-lobby sila ngadto sa kongreso ug ilang ipasabot nga gusto sa kapolisan nga ang helmet nga ipagamit sa mga motorista gawas nga lig-on ang kalidad, makita ug maklaro ang dagway sa magsul-ob niini.

Matud pa ni Villacin nga usa sa ilang nasuta nga kun ang kriminal   magsul-ob og helmet nga maklaro ang ilang dagway, bation kini og dyutay nga kakulba ilabi na kun masuta niya nga klaro kaayo ang iyang dagway inigbakyaw niya sa iyang kamot aron mopatay o kaha manulis.

Busa gumikan sa kakulba may posibilidad nga dili niya maintimano ang biktima o kaha dali siyang madakpan sa dakong kalagmitan nga dali ra siyang matarantar gumikan sa kakulba ug kabalaka.

Samtang matud pa ni Villacin nga kun sirado ug tainted pa ang helmet nga isul-ob sa usa ka kriminal, walay tihik-tihik kining mohimo og krimen tungod sa dakong pagsalig nga dili hiilhan ang iyang dagway ni kinsa mang makakita kaniya. (/WC)(BANAT NEWS)