CEBU, Philippines - Naangol ang usa ka tanod ug kauban niini human sila pamusila samtang nag-apil- apil sa personal nga away sa pamilya didto sa Sitio Dao barangay Tubod siyudad sa Toledo niadtong Domingo sa hapon.
Ang mga biktima mao si Simon Camoro, 39, minyo , ug si Felix Caballero, 59, tanod sa barangay Subayon,Toledo.
Samtang ang suspek mao si Ireneo Linihan,39, minyo, nga nagpuyo sa barangay Tubod, Toledo.
Si SPO4 Gil Lastimosa, desk officer sa Toledo City Police Station mibutyag sa Banat News nga ang suspek hubog nga miuli sa ilang balay ug nagkaaway kini ug ang iyang asawa.
Ang mga biktima nga nakabati sa away sa pamilya miadto kini sa pinuy-anan sa magtiayon ug mibadlong sa ilang away.
Apan ang hubog nga suspek nasuko nga gibadlong hinungdan nga milanit kini sa iyang paltik nga armas de fuego nga wala hisayri ang kalibre ug gitagsatagsa pagpusil ang mga biktima.
Si Camoro naigo sa tuong paa ug wala usab nga batiis ni Caballero maoy nasabak.
Ang suspek human sa hitabo misibat dayon samtang ang duha ka biktima daling gihatud ngadto sa Toledo City District Hospital ug luwas na sa peligro.
Ang kapolisan padayon pang nagpangita sa suspetsado. (BANAT NEWS)