CEBU, Philippines - Lima ka mga edipisyo ang naugdaw apil na ang bakery nga gipanag-iya og kagawad sa barangay sa dakong sunog kagahapon sa alas 3:15 sa kaadlawon sa barangay Buanoy sa lungsod sa Balamban.
Ang danyos sa maong sunog gibanabanang mokabat ngadto sa P1.3 milyones kini base sa imbestigasyon sa kabomberohan.
Ang naugdaw nga edipisyo mao ang Kings Lechon & Eatery nga gipanag-iya ni Dennis Garcia, barangay kagawad sa lugar, Sonny Bakeshop nga gipanag-iya ni Paulino Pezalbon taga barangay Cansaga lungsod sa Consolacion.
Naugdaw usab ang boarding house nga gipanag-iya ni Esmit ug Exequil Legaspino ug duha ka panimalay nga ila ni Cheryl Tampus ug Emalyn Lasgano.
Matud ni FO1 Rammil Tapia sa Balamban fire station dihang nahinabi sa Banat News didto magsugod sa abandonadong pinuy-anan ni Cheryl Tampus nga ginama sa gaay nga materyales ang kalayo nga daling mikatap sa mga kasikbit. Gipaubos sa general alarm ang kombate sa kalayo ug miabag usab ang kabomberohan sa siyudad sa Toledo. Nakontrolar kini alas-4 na sa kaadlawon.
Matud ni PO2 Godofredo Dumdum sa Balamban Police Station dihang nahinabi sa Banat News ang mga nasunog nga panimay ug edipisyo nagsikitsikit sa compound maong daling mikaylap. Hinuon walay naangol o nakalas atol sa maong sunog. (BANAT NEWS)