CEBU, Philippines - Mikabat sa P5 mil ang salapi ug ubang butang sa usa ka factory worker nga gitulis sa tulo ka tawo nga nagsakay og motorsiklo didto sa barangay Cogon West, lungsod sa Carmen kagahapon sa alas 4:15 sa kaadlawon.
Ang biktima mao si Babie Ann Castro, 26, dalaga ug nagtrabaho ug nagpuyo sa nahisgutang lugar.
Si SPO2 Danilo Laurente, desk officer sa Carmen Police Station mibutyag sa Banat News nga ang biktima naglakaw paingon sa iyang trabahoan dihang kalit lang mihunong sa iyang atubangan ang usa ka motorsiklo nga giluwanan og tulo ka wala hiilhing mga tawo.
Unya nanaog ang naglingkod sa luyo, giduol ang biktima ug gitionan og kutsilyo ang liog dayung pahibawo nga tulis.
Wala makalihok ang biktima gumikan sa kakuyaw ug gani ang shoulder bag niini nga gisudlan sa P3 mil nga cash ug cell phone ug ang mga mahinungdanong dokumento nasakiyo sa mga tulisan.
Ang kapolisan padayon pa sa ilang hot pursuit operation batok sa mga suspek aron sa pagsikop niini. (BANAT NEWS)