UNA may opisyal nga pamahayag sa kaso ni Garcia

CEBU, Philippines - Si Cebu Governor Gwendolyn Garcia nahiagom sa pagpanghasi nga politikanhon, sumala sa opisyal nga pamahayag sa partidong iyang gipasilungan. Kini human masayri ang giingong gidalidali nga pagpasaka og kasong graft and corruption batok sa gobernador ug ubang mga opisyal sa lalawigan sa Sugbo.

Ang kinatibuk-ang mga opisyal ug membro sa United Nationalist Alliance (UNA) mipagawas sa ilang hiniusang baruganan batok sa maong kaso   nga gipasaka sa Ombudsman ngadto sa Sandigangbayan.

Si Congressman JV Bautista sa UNA mihulagway   nga usa kini ka "political harassment and persecution" sanglit susama usab kini sa kasinatian sa gobernador sa Zamboanga nga sakop usab sa UNA.

Matud pa ni Cong. Bautista nga makaduda kaayo ang tayming sa pagpasaka sa maong kaso kay gihimo kini human ika-anunsiyo nga usa ka official senatorial candidate sa UNA si Gov. Garcia.

Gitug-an ni Cong. Bautista nga dili lamang ang mga local chief executive ang gigukod sa kasamtangang administrasyon kundili lakip na usab ang mga opisyal sa polis, bombero ug prisohan nga dili mosunod sa politikanhong gusto niini.

Subay niini, nanawagan ang mga opisyal sa UNA nga gipangulohan nila ni Vice President Jejomar Binay, Senate Pres. Juan Ponce Enrile ug kanhi presidente Joseph Estrada nga ipaundang na sa administrasyon ang politikanhong paggukod sa dili kaalyado niini kay mao kini ang makawagtang sa ilang dungog ug aron makapakita sila sa limyong dalan paingon sa limpyong election sa sunod tuig.

Matud pa sa opisyal nga pamahayag sa UNA nga ang makapakurat nga lakang sa pagpasuspenso kang UNA senatorial bet Garcia usa ka pagdaugdaog kaniya kinsa misilbi sa tinarong nga paagi ngadto sa mga konstituwente niyang Sugboanon. (BANAT NEWS)