CEBU, Philippines - Ang Aboitiz Foundation, uban ang Aklat, Gabay, Aruga tungo sa Pag-angat at Pag-asa (AGAPP) Foundation, mi-turn over sa 21 ka kindergarten school building ngadto sa Department of Education (DepEd) niadtong miaging buwan didto sa Marco Polo Hotel sa dakbayan sa Davao. Sila si Aboitiz Foundation President Jon Ramon Aboitiz ug AGAPP Chairperson Pinky Aquino-Abellada maoy nangulo sa turnover ceremony uban ang mga Aboitiz Group executives; mga opisyal sa DepEd, lokal nga kagamhanan, ug ang mga principal sa mga benepisyaryo nga mga tulunghaan.
Si Aboitiz ug si Aquino-Abellada mismo ang nangunay sa pagtunol sa mga bag-ong building ngadto sa Inawayan Elementary School ug sa Binugao Central Elementary School sa Santa Cruz, Davao del Norte ug ang Catalunan Grande Elementary School nga nahimutang sa dakbayan sa Davao.
Niadtong 2011, ang Aboitiz mipasalig nga magtukod og 67 ka eskwelahan sa tibuok nasud sulod sa tulo ka tuig ug sa wala pa matapos ang maong tuig nakahimo og 26 ka eskuylahan ang maong foundation ug natunol dayon kini ngadto sa mga hingtungdang benepisyaryo.
Sa pagkakaron, misaka na sa 47 ang gidaghanon sa mga eskwelahan ang gitugyan sa maong foundation ngadto sa DepEd.
Samtang mikabat usab sa P47 milyones ang kinatibuk-ang gasto sa pagtukod sa maong mga school building.
Sa tuig 2013, dugang 20 pa nga mga school building ang gipaabot nga tukoron ubos sa alyansa sa Abotiz Foundation ug sa AGAPP. Mga 7,300 nga mga tinun-an ang gipaabot nga makabenepisyo sa mga bag-ong classrooms.
Ang disenyo sa mga classroom gipasubay sa “Silid Pangarap” project sa AGAPP diin single storey nga edipisyo adunay tagduha ka classroom diin ang usa ka lawak gitagana alang sa mga klase samtang ang laing lawak gihimong library. - BANAT NEWS