Mensahe sa ika-93 nga anibersaryo sa The Freeman

CEBU, Philippines - Ang pagbuhat og maayong butang sa kasamtangang panahon maoy yawe alang sa pagkab-ot sa positibong mga butang sa umaabot nga mga adlaw.

Mao kini ang unod sa wali ni Msgr. Joselito Tajanlangit kinsa maoy nangulo sa santos nga misa kagahapon alang sa ika-93 ka tuig nga anibersaryo sa pamantalaan nga The Freeman.

Matud pa ni Tajanlangit nga bisan og gisugat og mga pagsuway kaniadto ang The Freeman, wala gyud kini mabungkag gumikan sa mga tawo nga nagtinabangay aron kini magpabilin nga lig-on sa paghatud sa mga balita ngadto sa katawhan. Dugang pa niya nga nagpas-an og dakong responsibilidad ang The Freeman alang sa komunidad aron masayud kini sa mga panghitabo sa ilang palibot.

Importante usab ang paghatag og bili sa mga grasya nga madawat gikan sa Kahitas-an aron kini makanunayon nga maabot sa kinabuhi.

Dugang pa niya nga usa ka prebelihiyo ang trabaho sa usa ka reporter busa gamiton kini sa tukma ug husto nga pamaagi aron kini mapuslan sa komunidad.

Samtang ang chairman sa The Freeman ug Banat News nga si Dr. Jose R. Gullas mipadayag nga dili gyud niya puwede nga biyaan ang labing karaan nga pamantalaan sa Sugbo gumikan kay gisakripisyohan niya kini og daghang mga pagsuway busa gihatagan niya kini og dakong importansya.

Nagpasalamat usab siya sa tanang mga tawo nga nahimong loyal o matinud-anon kaniya ug   sa kompaniya busa giaporan niya kini og mga pahalipay kagahapon.

Dugang pa ni Gullas nga gitratar niya nga ang The Freeman ug Banat News isip kabahin na sa iyang kinabuhi ug sa iyang adbokasiya nga mohatud sa mga impormasyon nga angayang hisayran sa katawhan. - BANAT NEWS