Killer truck 2 patay

CEBU, Philippines - Duha ka tawo ang nakalas human usa ka oil tanker ang nasampak sa gihimong paril sa usa ka simbahan sa barangay Poog siyudad sa Toledo niadtong Lunes sa alas 3:30 sa hapon.

Ang mga biktima mao si Jonathan Sotto Ravanes, 29, nagpuyo sa Mercado Farm sa maong barangay kinsa maoy mason nga naghimo sa maong paril dihang nahitabo ang aksidente, samtang namatay usab ang drayber sa oil tanker truck nga si Rowen Durano Casas, 30, taga barangay Cambanay sa siyudad sa Danao.

Si Casas drayber sa Pilipinas Transport Inc. nga nagbase sa V. Gullas St . , siyudad sa Sugbo.

Matud ni SPO1 Roel Tadique sa Toledo City Police dihang nahinabi sa Banat News mibutyag nga nag-finishing si Ravanes pagkongkreto sa paril sa simbahan sa Sacred Heart Parish daplin sa dalan nianang tungora dihang kalit nga misampak ang maong oil tanker. Ang maong oil tanker gikan pa sa siyudad sa Mandaue padulong unta sa Balamban nga nagdala og lana.

Samtang nagdulhog ang maong oil tanker sa karsada tungod sa kabug-at sa karga niini wala na mopaak ang brake ug tungod kay dulhogon nga likuon ang maong dapit nawad-an og kontrol ang drayber ug nalahos sa maong koral sumala pa ni Tadique.

Si Ravanes napiit og maayo sa gitrabahong paril ug sa maong trak hinungdan sa grabeng pagkagusbat sa lawas niini samtang maayong pagkapiit sa drayber nga si Casas.

Sa susamang dapit usab nahitabo ang aksidente nga gikalambigitan gihapon og dakong trak nga mikalas og mga kinabuhi sa mga tawong namista kapin usa ka tuig na ang nakalabay. (BANAT NEWS)