Isyu sa sinkhole sa Barili susihon sa Capitol

CEBU, Philippines - Miumol ang Hunta Provincial sa lalawigan sa Sugbo og Ad hoc committee aron maoy mosusi sa sinkhole sa sapa sa Mantayupan nga nakapahubas sa tubig niini ug sa busay sa maong barangay nga nailhang Mantayupan falls sa miaging semana.

Kini ang usa sa mga desisyon nga nakab-ot sa mga sakop sa hunta atol sa ilang senemanang session.

 Ang nahisgutang Ad hoc Committee pangulohan sa Chairman sa Committe on Agriculture, nga si third district board member Alex Binghay ug ang mga miyembro niini nga gilangkuban sa mga chairperson sa committee on Tourism, Peace and Order, environment ug ni third district board member Ian Zambo.

 Samtang giaprobahan usab sa provincial board ang resolution ni Zambo nga nag-awhag sa Department of Environment and Natural Resources (DENR) ug Mines and Geosciences Bureau (MGB) sa pagpaimbestigar sa nahisgutang hitabo.

 Buot usab ni Zambo nga human sa imbestigasyon, ang opisyal sa DENR ug MGB mopadayag sa ilang report ngadto sa Hunta Provincial .

Kahinumdoman nga naukay ang mga taga Barili sa miaging semana sa paghubas sa Mantayupan falls kay gisuyop sa usa ka sinkhole ang ibabaw nga bahin sa maong sapa.

Gumikan kay didto man moagi sa maong sinkhole ang tubig ug mitipas og agianan, wala nay miambak nga tubig didto sa pangpang nga ambakanan niini .

Hinuon bisan nahiuli na sa orihinal ang sapa ug ang buhagay niini ngadto sa kapatagang bahin sa lungsod, sa gihapon gusto sa kagamhanan sa lalawigan nga masayran unsa gyuy hinungdan sa maong hitabo. (BANAT NEWS)