CEBU, Philippines - Namatay diha-diha ang usa ka drayber sa taxi human kini pusila sa wala hiilhing tawo didto sa Sitio Tuburan, barangay Punta Princesa dakbayan sa Sugbo pasado ala 1:00 kagahapon sa kadlawon.
Giila ang biktima nga si Jime Abella, 27, ulitawo, nga may kapuyo ug residente sa maong dapit. Ang nakasaksi sa maong hitabo nga si Roselle Daclan silingan sa biktima mibutyag sa kapolisan nga gikan siyang naninda og barbecue dihang pag-abot niya sa ilang balay nakadungog siya og tulo ka buto sa armas de fuego .
Dihang gilili niya kini sa ilang bintana maoy nakita niya ang wala hiilhing kriminal nga nagdagan pahilayo sa maong lugar ug gibiyaan ang nagbuy-od sa yuta nga naglunang na sa kaugalingon dugo ang biktima. Ang kapuyo sa biktima nga si Lovella Baricuatro mitug-an usab sa kapolisan nga nakasulti kaniya si Abella sa buhi pa kini nga gikabikil niya ang usa ka barangay tanod sa ilang dapit nga gihinganla’g Otek Jabonero. Sa pagkakaron padayon pang gipangita sa kapolisan ang kriminal. WC - BANAT NEWS