CEBU, Philippines - Daghan sa mga drayber nga gusto kaayong mahisama ilang kahimtang sa mga drayber sa bus pasaheroan nga magdawat na og fixed-rate salary uban sa tanang benepisyo sa usa ka mamumuo subay sa gilatid sa Department of Labor and Employment (DOLE) dinhi sa nasud.
Si Martin Laridia, 42, taga barangay Tayud sa lungsod sa Consolacion nga nahinabi sa Banat News maoy mipadayag kagahapon niini.
Matud pa niya nga labing lisod ang ilang kahimtang nga mga drayber sa PUJ itandi sa mga bus nga pasaheroan kay giabangan nila ang unit nga ilang gimaneho ug naggasto pa sila sa gasolina.
Kini ang rason nga sila maoy unang maapektohan matag adunay pag-usbaw sa presyo sa produktong petrolyo.
“Modawat man lang og limpiyo ang operator. Mao nga kami gyud maoy masugamak sa problema kun mosaka ang presyo sa krudo ug gasoline,” matud pa niya.
Sumala pa niya adunay mga adlaw nga maglisod sila sa pagkuha sa ilang kita sa pagpamasahero sa abang maong usahay ilaha na lang kining utangon.
“Usahay ang katunga lang among abangan ug ang mahibilin amo na lang datadatahan,” dugang pa ni Laridia. Si Land Transportation Franchising and Regulatory Board-7 director Ahmed Cuizon sa nangaging interbyu sa Banat Manobela miingon nga ‘pioneering’ program pa lang ang paghatag og fixed nga suholan sa bus drivers ug konduktor.
Kung mogawas nga maayo kini dili layong mapatuman usab kini sa ubang sektor sa transportasyon. Usa sa hinungdan niini mao nga aron malikayan ang paglumba-lumba sa mga bus nga makailog og pasahero ug mag-overloading aron makadako og komisyon.
Sa nasayran nga sugod niadtong Hulyo 1 ang mga bus drayber ug konduktor magdawat na og minimum nga suweldo ug ingon man mga benepisyo isip regular nga mga kawani base usab sa DOLE Department Order No. 118. (/EIM) (BANAT NEWS)