VSMMC di una modawat og pasyente
CEBU, Philippines - Pipila ka mga wards ug pasilidad sa Vicente Sotto Memorial Medical Center (VSMMC) ang dili una modawat og mga pasyente tungod sa himuong tinuig nga preventive maintenance nga himoon sa VSMMC Infection Control Committee.
Sa Hulyo 19 ngadto sa 29, 2012 ang delivery ug labor room, ward I, ward II ug Neonatal Intensive Care Unit ang limpiyohan aron malikayan ang pagkatap sa mga impeksyon.
Tungod niini gipahibalo ni Gerardo Aquino Jr. ang Medical Center Chief 1 nga dili una sila manawat og mga pasyente nga may kalambigitan sa obstetric cases sa maong mga petsa.
Sa Hulyo 16, 2012 na sila subling magsugod og dawat og pasyente apan kadto lang gyung mga emergency cases ug kadtong mga manganakay na diha sa delivery rooms.
Buot sa VSMMC nga mahatagan og panahon ang ilang social workers sa pag-discharge sa mga nahibiling pasyente aron dunay lugar nga ilang kabutangan sa bag-ong ma-admit.
Ang mga pasyente adto lang una dad-on sa Saint Anthony Mother and Child ug sa Talisay City District Hospital kung gikan sa habagatang Sugbu ug ang gikan sa amihanan adto lang ipadala sa Eversley Child Sanitarium and General Hospital sa dakbayan sa Mandaue.
Si Dr. Gerardo Aquino Jr., Medical Center Chief I, sa VSMMC mihangyo sa publiko sa pagsabot sa sitwasyon tungod kay tinguha lang nila nga mahatagan og luwas ug limpiyo nga environment sa hospital ang mga pasyente. (/EIM) (BANAT NEWS)
- Latest
- Trending
