CEBU, Philippines - Ang mga V-Hires nga nagdagan sa habagatan ug amihanang bahin sa lalawigan sa Sugbo aduna na unyay fixed-fair rate tungod kay namatikdan nga dunay uban kanila ang mo-dive sa pletihan aron lang makailog og mga pasahero.
Si Land Transportation Franchising and Regulatory Board (LTFRB) Regional Director Ahmed Cuizon nagkanayon sa Banat News nga ang solusyon niini mao ang pagpatuman og fixed-fair rate ang mga V-Hires.
Matud pa ni Cuizon nga ilang nabantayan nga ang mga V-Hires nga dunay mga panahon nga bisan duol ra ang destinasyon mahal ang pangayo ug duna say higayon nga bisan sa kalayo sa destinasyon barato ra ang pangayo sa mga drayber.
Kini aron lang gyud makapamintaha sa ubang mga V-Hires. Hinuon gikinahanglan pang makigtagbo ang LTFRB sa mga V-Hire operators aron tukion kini kun pila unyay minimum nga pletihan ug ang mosunod ang patak niini.
Apan nagproblema karon si Cuizon tungod kay walay organisadong kahugpongan ang mga V-Hires nga ilang mapatawag dili sama sa ubang pamasaheroan nga dunay kaugalingong mga organisasyon. - BANAT NEWS