20 ka top taxpayer gipasidunggan

CEBU, Philippines - Subling nag-una ang Shangri-La Mactan Resorts and SPA sa Top 20 Tax Payers sa dakbayan sa Lapulapu.

Kini nasayran atol sa gilusad sa kagamhanan sa dakbayan nga kalihokan sa pasidungog sa nag-unang 20 ka mga pamatigayong magbubuhis sa maong lugar niadtong Biyernes didto sa Movenpick Resorts and SPA sa maong dakbayan.

Ang maong kalihokan personal   nga gitambongan ni Consul Yoshiaki Hata ang Councilor ug Consul sa nasud sa Japan ug Zhang Weirguo ang Consul General sa nasud sa China ug ni Lapulapu City Mayor Paz Radaza uban sa mga opisyales sa dakbayan sa Lapulapu.

Ang Top 20 Tax payers gipangunahan sa Shangri-La’s Mactan Island Resorts, Taiyo Yuden, General Milling Corp., Imperial Palace, Fil Invest, Waterfront Hotel, Gaisano Grand Group, Muramoto Audio-Visual Phils. Corp./Maple, Lear Automotive, Plantation Bay Resort and SPA, Movenpick Resort and SPA, Yamashin Cebu Filter Manufacturing Corp., Fairchild Semiconductor, Bigfoot Properties. Inc., Prohomes Dev. Inc., Olympus Optical Technology Phils. Inc., Lexmark International (Phils.) Inc., Ajinomoto Phils. Corp., PLDT Co. ug East Asia Utilities Corp.

Atol sa pakigpulong ni Mayor Radaza iyang gipasalamatan ang ka sinsero sa maong mga kompaniya sa pagbayad sa ilang buhis ngadto sa kagamhanang local sa dakbayan sa Lapulapu gumikan kay dako kini ikatabang sa kalambuan sa maong dakbayan.

Gipahibalo usab ni Radaza nga dugang mga investor ang mobubo og puhonan sa dakbayan sa Lapulapu gumikan sa ilang maayong pag-atiman sa mga negosyante.

Usa niini ang umaabot nga P10 bilyones nga tukorong    Megaworld sa 16 hectaryang yuta sa Mactan New Town sa Brgy. Mactan unom ka tuig gikan karon. - Bong Soriano/WC (BANAT NEWS)