Gumikan sa 4Ps daghang naka-eskuwela

CEBU, Philippines -  Misaka ang gidaghanon sa mga kabataang kabus nga mieskuyla karon nga maoy epekto sa programa sa administrasyon sa pagtabang sa mga kabus nga ginikanan aron makalahutay ug makapanikaysikay sa panginabuhi. Matud pa ni Jaybee Binghay, tigpamaba sa Department of Social Welfare and Development (DSWD)7 nga dako kaayo og epekto sa pagpaarang-arang sa panginabuhi sa mga pamilyang kabus nga nasuportahan pinaagi sa Pamilyang Pilipino Pantawid Program (4Ps) nga gipatuman ubos sa kasamtangang administrasyon

Ang 4Ps gitumong aron ang mga pamilya nga may mga anak nga nagpangidaron og usa ngadto sa 14 anyos kansang mga ginikanan walay tarong nga panginabuhi, gipasakop sa maong programa ug gisuportahan ang mga anak sa matag buwan aron kini maka-eskuyla ug aron usab makakita og panginabuhi sa kinabus nga paagi ang mga ginikanan.

Matud pa ni Binghay nga silang taga DSWD maoy saksi sa kauswagan og dyutay sa panginabuhi sa mga ginikanan nga gipaubos sa 4Ps. Sa samang higayon si Ailenn Lariba kauban ni Binghay nagkanayon nga sila ang nag-monitor sa panginabuhi sa mga ginikanan ug ang pag-eskuyla sa ilang mga anak ug nakita niya subay usab sa mga paniid sa taga Dep-Ed nga nakatabang gyud ang 4Ps nga programa sa pag-agak sa mga anak nga kabus aron makapadayon sa pagtungha sa eskuylahan.

Gituohan ni Binghay ug Lariba nga hangtod sa pag-tak-op sa termino ni    Presidente Benigno Aquino sa tuig 2016, daghan na nga pamilyang Pilipino ang makabaton og kauswagan sa panginabuhi pinaagi sa suporta nga gitanyag kaniya sa kagamhanan. (BANAT NEWS)