CEBU, Philippines - Karong Domingo (Hulyo 1) mao nay sugod sa pagpatuman sa regular minimum wage sa mga bus conductors ug drivers base sa Department of Labor Department order 118-12.
Apan ang Cebu Provincial Bus Operators Association (CPBOA) wala maka-uyon sa maong kamandoan kay gihulagway nila kining ‘discrimination’ o may gipaboran.
Gisaway kini sa presidente sa CPBOA nga si Richard Corominas tungod kay ang drayber ug konduktor lang sa mga dagkong bus pasaheroan ang gisiguro sa DOLE nganong walay labot ang mini-buses.
Si Land Transportation Franchising and Regulatory Board (LTFRB) Regional Director Ahmed Cuizon mipasabot hinuon nga dili ‘discriminating’ ang order sa DOLE ug LTFRB kay mao pa kini ang unang higayon nga suwayan nga sweldohan ang mga drayber ug konduktor ug ilaha pang obserbahan ang resulta niini.
Hinuon gipasalig ni Cuizon nga kun maayo ang resulta niini ilaha unya kining ipatuman sa ubang matang sa pasaheroan.
Ang DOLE mimando sa bus operators nga pasweldohan og minimum wage ang ilang mga drayber ug konduktor.
Nagpasabot kini nga wala na kinahanglana pang mag-apas, mag-overloading ug magpaturatoy aron makailog og pasahero ang mga bus.
Pinaagi usab niini malikay sila sa disgrasya samtang masiguro ang ilang mga benepisyo ug kinitaan sulod sa walo ka oras nga dili sila mahago nga sagad makaingon sa mga sipyat ug madisgrasya.
Makadawat usab ang mga konduktor ug drayber ug 12 ka regular holidays ug day-off matag semana. Ug kinahanglang aduna silay katungod nga maka- leave o absence, sama sa parental leave, sick leave ug uban pa.
Dunay dugang 10% nga night shift pay kun ang ilang duty magsugod og alas-10 sa gabii ngadto na sa alas-6 sa buntag.
Ang sa Memorandum Circular no. 2012-001 sa LTFRB mimando sa mga operators nga ipatuman nila ang order sa DOLE, ug ang kopya sa payroll sa ilang mga drayber ug konduktor maoy usa sa rekisitos aron ma-renew ang ilang mga prangkisa.
(BANAT NEWS)