CEBU, Philippines - Gipahimangnoan ni Mayor Michael Rama ang konseho sa siyudad sa Sugbo tun-an nila og maayo ang Local Government Code sa dili pa sila moduso og mga ordinansa ilabi na ang kabahin sa responsibilidad sa executive ug legislative ug ilabi na kung ang katuyoan niini mao ang pakigbangga sa gahom sa mayor.
Kini maoy reaksyon ni Rama human misugyot si Konsehal Noel Eleuterio Wenceslao og ordinansa nga mag-protiher sa South Road Properties pinaagi sa pagbabag sa mayor nga makabaligya og mga lote niini.
Ang giduso nga ordinansahon padayon pang gitun-an sa Committee on Laws nga gipangulohan ni Konsehal Sisinio Andales, ang duha dayag nga kaalyado sa higpit karong karibal sa politika ni Rama nga si Kong. Tomas Osmeña.
Si Osmeña kusganong misupak sa pagbaligya sa mga luna sa SRP ning si Rama na maoy namuno sa siyudad.
Matud pa sa mayor dako og matabang sa mga problema sa siyudad pinaagi sa dugang trabaho sa mga Sugbuanon kun duna nay mga matukod nga establisamento sa maong dapit. ( EIM) - BANAT NEWS