CEBU, Philippines - Ang batan-ong Gullas nga si Gerald Anthony “Samsam” Gullas Jr. kompirmado nang maoy mosunod sa tahas sa iyang apohan nga si Kongresista Eduardo Gullas sa unang distrito.
Sa press conference diha sa Marco Polo Plaza Hotel, barangay Lahug, dakbayan sa Sugbo kagahapon sa buntag ang banggiitang magbabalaod mipahibawo nga si Samsam maoy ilang padaganon isip Kongresista sa unang distrito sa sunod tuig nga eleksiyon.
Ang Kongresista kinsa ubos na karon sa kataposang termino nakaserbisyo sulod sa 25 ka tuig sa Kongreso, 10 ka tuig pagkagobernador ug tulo ka tuig isip mayor sa dakbayan sa Talisay. Kagahapon ang pamilyang Gullas, mga opisyales gikan sa unang distrito nga magsugod sa dakbayan sa Talisay, lungsod sa Minglanilla, dakbayan sa Naga, lungsod sa San Fernando, dakbayan sa Carcar ug lungsod sa Sibonga ang mitambong sa maong kalihukan.Si Gullas nagkanayon nga iyang naobserbahan nga dunay 101 nga neophytes sa Kongreso nga nagpanuigon gikan sa 25, 28 ug 29.
Gibutyag ni Gullas nga nagsugod siya kaniadto sa usa ka civic organization ug wala gyud siyay kamahoan sa politika dihang una siyang nasulod niini. Matud pa niya walay formal training sa pagka politiko kay makat-unan ra kini.
“As long you are humble you will continue to learn and serve well,” pasabot pang Gullas dungan sa paghangyo sa mga lider sa kalungsoran sa iyang distrito nga paluyohan ang iyang apo. Si Samsam kinsa usa ka academic excellence ug Presidential Awardee in leadership, sa iyang bahin, miingon nga 100 porsiyento siyang andam mosulod sa politika.
Matud pa niya daghan siyang nakat-unan ug makat-unan pa gikan sa mga ipangtudlo ni Kong. Gullas.
“I am under my papa Eddie, I think it is an advantage that I learn from him, it could be a bad thing to others. But I look at it as a good thing, when papa Eddie ran nobody mentoring him, but me I have him…. I will continue what my grand father had started,” ni Samsam pa. (BANAT NEWS)