Wanted nga ex-police nadakpan sa CIDG

CEBU, Philippines - Kanhi pulis nga sakop sa Punta Princesa Police Station sa Cebu City Police Office (CCPO) ang gidakop sa Criminal Investigation and Detection Group (CIDG)-7 sa miaging gabii diha sa basketbolan sa .A Lopez Extension ,Balaga Drive sa barangay Labangon ning siyudad. Si Sr. Supt. Jose Pante, hepe sa CIDG-7 miila sa ilang dinakpan nga mao si kanhi PO1 Alejandro Desuyo II, 37, nagpuyo sa maong lugar ug kanhi sakop sa CCPO ug nadestino sa Station 11 sa Punta Princesa Police Station.

Ang CIDG armado og Warrant of Arrest (WOA) sa kasong murder batok ni Desuyo nga giisyu niadtong Pebrero 22, 2012 ni Presiding Judge Concordio Baguio sa Regional Trial Court (RTC) Branch 4 didto sa Lanao del Norte.

Matud ni Pante nga nadestino kaniadto si Desuyo dinhi sa dakbayan apan nalambigit siya sa ilegal nga kalihokan hinungdan nga gipalabay siya sa Police Regional Office (PRO)-7 ngadto sa PRO-11 sa Iligan City.

Wala hinuon makahibawo si Pante kung kanus-a nakapatay si Desuyo didto sa Iligan City apan base sa iyang impormasyon sa miaging tuig pa mi-awol si Desuyo. Si Desuyo ngadto nganhi lang sa dakbayan sa Sugbu apan wala siya makahibalong nalutsan na diay siya og WOA sa kasong murder.

Matud ni Pante nga duha na ka semana nakadawat sila og impormasyon nga ania sa Sugbu si Desuyo hangtud nga nasigpatan kini sa mga sakop sa Community Intelligence Service (CIS) nga nagduwa og basketball sa maong lugar hinungdan nga kini nadakpan. Si Desuyo dihang gisuwayan og kuhag reaksyon nagdumili kini pag-atubang sa mga sakop sa mga tigbalita. (BANAT NEWS)