Tulisan gidemalas nadakpan sa off-duty nga polis

CEBU, Philippines - Usa ka tulisan ang gidemalas nga nadakpan sa off-duty nga pulis human naaktuhang mitulis sa usa ka batan-ong sakay sa jeepney niadtong Huwebes sa alas-3 sa hapon diha sa dalan S. Osmeña, Pier 4 North Reclamation Area sa barangay Mabolo ning siyudad.

Si William Gingoyon , 22, taga Tejero nakwelyohan human gigukod ni PO3 Arvin Guiroy sakop sa Special Weapons and Tactics (SWAT) sa Cebu City Police Office (CCPO) nga niadtong tungora off-duty.

Si Gingoyon uban sa ginganlan og Ramil alyas ‘Baho’ maoy gitumbok nga mitulis sa 16-anyos nga lalaking tinun-an sa UC-Banilad.

Matud sa biktima sa Banat News nga samtang siya nagsakay sa jeepney kalit siyang gitionan og kutsilyo sa usa sa mga tulisan ug gikuha ang iyang cellphone.

Suwerte nga nagsunod si Guiroy kuyog sa iyang anak luwan sa ilang sakyanan ug nakakita sa hitabo ug daling migukod hinungdan sa pagkasikop ni Gingoyon.

Sumala pa sa kapolisan nakuha gikan sa posisyon ni Gingoyon ang usa ka gamay’ng sanggot ug drug paraphernalia ug ang cellphone sa biktima, apan nakaipsot ang kauban niini.

Gihimakak hinuon ni Gingoyon nga iyang gitulis ang biktima ug gipasanginlan niya ang polis nga mi-planted og ebidensya. Giangkon hinuon niining niadto lang Mayo 12 siya nakagawas sa Cebu City Jail sukad napaslak siya niadtong tuig 2007 gumikan sa kasong robbery ug snatching. (BANAT NEWS)  

Show comments