Mariñas mihagit sa iyang kritiko

CEBU, Philippines - Gihagit ni Mayor Teresito “Ondo” Mariñas sa Barili ang iyang mga kritiko sa pagkiha kaniya kun nagtuo sila nga gibulsa niya ang kuwarta alang sa gasolina ug krudo nga alang sa trak sa basura sa lungsod.

Ang maong hagit gihimo ni Mariñas karong nabaho na ang basura sa atubangan sa merkado publiko sa Barili kay wala nay trak nga mohakot niini. Busa iyang gihangyo ang iyang tagilungsod nga magtinabangay sa pagpanghinlo sa palibot karon nga wala nay trak nga makahipos sa basura kay wala nay budget alang sa gasolina ug krudo.

Usa sa iyang gisugyot mao ang pag-iyahay sa pagpanghipos sa basura sa matag panimalay ug tumanon ang segregation law kon pagbahig sa malata ug di malata nga basura.

Si Mariñas mihimo ning maong awhag atol sa interview sa Bantay Radyo ug mipasabot sa mga molupyo sa Barili nga mao na lang kini ang bugtong paagi aron dili mabaho ang lungsod.

Usa sa iyang gikabalak-an nga kun mabaho ang lungsod gumikan sa basura, mahitabo usab ang paghugpa sa nagkalainlaing balatian nga sayon kaayong mokutlo og kinabuhi sa katawhan ilabi na sa kabataan. Iyang gipasabot sa Barilinhon nga gipugngan na sa mga konsehal sa lungsod ang budget alang sa krudo ug gasolina sa mga tighakot nga trak sa basura busa kinahanglang mangita gayud og solusyon ang katawhan.

Matud sa mayor nga gikan sa P2.6 milyones nga gahin sa krudo sa tanang 30 ka mga sakyanan sa lungsod nga gipangayo sa buhatan sa mayor, P600 mil ra ang gi-aprobahan sa konseho sa tibuok tuig.

Maoy hinungdan nga wala na mahakot ang mga basura nga nagtipun-og sa merkado sa lungsod tungod kay gikan sa Enero hangtud   lang sa buwan sa Marso niining tuiga ang P600 mil nga gigahin sa mga konsehal alang sa krudo ug gasolina.

Matud pa ni Mariñas nga ang utanganan sa kagamhanan og krudo ug gasolina nga mao ang D’acers Gasoline Station nga nahimutang sa barangay Mantalongon, Barili dili na magpautang og gasolina ug krudo kay ang utang sa kagamhanan nga P259 mil alang sa bulan sa Abril ug Mayo ning tuiga wala kabayri kay wala aprobahi   sa mga konsehal nga pinili sa katawhan ang gipangayo sa buhatan sa mayor nga supplemental budget alang sa maong katuyoan.

Busa nakahukom ang mayor nga mogamit nalang ang lungsod og sikad-sikad nga maoy mohakot sa mga basura matag adlaw kay wala na kini magkinahanglan og gasolina ug krudo.

Unya ang matag panimalay kinahanglang mogama og compost pinaagi sa paglungag sa yuta sa palibot sa ilang balay aron adto ilabay ang basura nga malata nga magamit usab nilang abuno sa ilang mga pananom.

Sayo niini gibutyag ni Bise Mayor Marlon Garcia   nga wala taronga sa mayor ang paggamit sa gahin alang sa gasolina ug krudo sa mga sakyanan maoy hinungdan nga wala na nila kini gahini og dakong kantidad. 

Usa sa gipasabot ni Garcia mao ang grass cutter nga mikonsumo og 20 litros sulod sa duha ka semana nga nakapatingala kanila nganong ingon niini kadako ang konsumo nga gasolina sa maong grass cutter.

Unya matud pa sa bise mayor nga nahibulong usab sila kay ang trak sa bombero bisan walay sunog mikonsumo usab og gasolina hinungdan nga wala na sila mohatag og gahin alang niini.

Hinuon gitubag ni Mariñas ang maong pamahayag sa bise mayor ug iyang gipasabot nga ang grass cutter nga mikonsumo og 20 litros gigamit sa pagpanghabas sa mga sagbot sa palibot sa lungsod.

Ang trak sa bombero mikonsumo usab og gasolina bisan walay sunog kay gigamit   kini sa pagpanghinlo sa mga imbornal sa lungsod aron nga dili mabaho ang palibot.

Apan gihagit sa mayor ang iyang mga kritiko sa pagpasaka ug pormal nga kaso sa Ombudsman o Commission on Audit COA aron kun tinuod mang giwaldas o kaha gibulsa niya ang mga gahin alang sa krudo ug gasolina sa mga sakyanan sa lungsod ug uban pang galastuhon sa administrasyon kasilotan siya.(/WC)  (BANAT NEWS)