Nakig-sex una nangawat

CEBU, Philippines - Gipangita karon sa kapolisan sa dakbayan sa Mandaue ang usa ka tulisan kinsa nakita-an sa usa ka CCTV camera sa usa ka tindahan og pintal diha sa barangay Maguikay nga nakighilawas ngadto sa usa ka babaye ug pagkahuman nanglungkab sa maong establisemento.

Nadiskubrehan sa mga kawani sa SDT Paints ang gibuhat sa maong kawatan tungod sa naguba nilang doorknob sa pultahan sa luyo sa ilang tindahan dihang nangabli na sila kagahapon sa buntag.

Sa ilang pagsubay mga sensilyo ra nga balor P560 ang nadala sa kawatan gikan sa usa ka drawer ug swerteng wa niini maablihi ang opisina nga dunay mga laptops ug computers.

Apan una mosulod ang maong kawatan sa tindahan nakuha kini sa CCTV camera sa maong tindahan nga nakighilawas sa usa ka babaye atubangan sa maong tindahan kagahapon sa kaadlawon.

Matud pa ni PO1 Restituto Raboy sa Investigative and Detective Management Bureau (IDMB) nakita sa CCTV camera nga gi-turnover sa tag-iya sa maong tindahan nga ang suspek naghigdahigda pa sa semento atubangan sa maong tindahan.

Samtang naghigda duna kini gitawgan ug taud-taud aduna’y usa ka babaye ang miabot. Dali niining gidala ang babaye sa kilid sa tindahan ug gihuboan kini og karsones ug panty samtang ang lalaki usab mihubo sa iyang cargo pants ug naghilawas ang duha.

Human niini mibiya ang babaye ug diha na gisugdan og guba sa lalaki ang door knob sa luyong bahin sa tindahan ug diretso kini sa drawer gikuha ang sensilyo ug mibiya.

Base sa gipahigayong imbestigasyon, nasuta nga niadto pang Sabado sa kaadlawon apan gahapon lang nadiskubrehan sa subling pagbukas sa tindahan.

Gipanghimakak usab sa mga kawani nga ilang kauban ang maong tawo apan kanunay nila kining makit-ang mag-estambay sa ilang tindahan. Ang kapolisan nangita na sa maong lalaki. (/EIM)  (BANAT NEWS)