P50M gigahin sa CITOM aron ilisan ang mga pintal sa dalan

CEBU, Philippines - Ang City Traffic Operations Management (CITOM) migahin og P50-milyones nga budget alang sa thermoplastic road marking paint, nga maoy gamiton sa pagpabag-o sa mga pavement markings sa tanang dalan sa siyudad sa Sugbo.

Ang maong proyekto gipatuman tungod sa daghan na kaayong reklamo gikan sa mga motorista ug sa mga enforcers tungod sa mga hanap ug napapas na nga mga pavement markings sa kadalanan. Nasuta pud nga mao kini ang usa sa mga hinungdan nganung adunay problema sa trapiko.

Si Atty. Rafael Yap, ang acting department head sa CITOM, nagkanayon nga mao kini ang unang higayon nga mogamit ang siyudad sa maong talagsaong klase sa pintal nga adunay extended life cycle kung ikumpara sa ubang conventional solvent based paints.

 Aduna kini sagol nga daw magsiga o reflectors ang mga pintal panahon sa gabii busa dili lisod alang sa mga motorista nga makita ang pahibalo sa trapiko.

“The thermoplastic road marking paint lasts longer with a span of over a year compared to those paints we’ve been using for years. During nightime, as long as the vehicles will have headlights, the paint will also serve as a reflector,” matud pa ni Yap.

Ang budget gi-aprobahan na isip proyekto sa CITOM karung tuiga ug ang bidding gikatakdang sugdan karung buwana hangtud sa Hulyo.

Ang renovation tungaon sa duha ka hugna. Ang unang hugna gibanabana nga sugdan karung Agosto gamit ang katunga sa giluwatan nga budget ug tarungon niini ang mga national roads, junction boxes ug ang mga pedestrian lanes. Ang ikaduhang hugna alang sa uban pang kadalanan sa Sugbo.

“We don’t want our investment wasted that’s why we made sure that whatever projects we will have, it would be worth it. We will try to cover all the roads in Cebu for this purpose,” matud ni Yap.

Kung mahuman na ang maong proyekto, matud pa ni Atty. Yap nga daku kaayo kini og ikatabang sa mga motorista, enforces ug sa publiko.

“Para sa atong mga motorists, mas orderly na ang traffic because there will be clear demarcation lines already and our enforcers, on the other hand, could already perform their tasks well,” niya pa. (BANAT NEWS)