CEBU, Philippines - Manumpa karong adlawa si Gob. Gwendolyn Garcia isip sakop sa Partido Demokratiko Pilipino – Lakas ng Bayan (PDP-Laban) sa kauluhan.
Kini ang maghawan sa agianan ni Garcia sa iyang pagpapili sa pagka-senador sa 2013 ubos sa United Nationalists Alliance (UNA) nga gipanguluhan ni Bise-Presidente Jejomar Binay.
Ang UNA gilangkuban sa PDP Laban nga gipanguluhan ni Binay ug Partido ng Masang Pilipino nga gipanguluhan ni kanhi Presidenti Joseph Estrada.
“After weighing all options and with my own introspection and reflection, I decided to make a go for national office and run for the Senate,” tipik sa gibutyag sa gobernadora sa interbyu sa ANC. Masaligon si Garcia nga ang iyang kasinatian isip gobernador sulod sa walo ka tuig paigo nang kasinatian nga maserbisyohan niya ang nasud.
Apan magpabilin si Garcia nga pangulo sa One Cebu Party nga ilang gitukod niadtong eleksiyon sa tuig 2007 matud pa sa secretary-general nga si Kong. Pablo John Garcia sa ikatulong distrito sa lalawigan sa Sugbo. BANAT NEWS