CEBU, Philippines - Pagpasabong og iring ug manok, hugaw sa baka gihimong burger ug mga lalaking nagsuot og sapot sa kababayen-an maoy nasaksihan sa tinuig nga "Baliw-baliw Festival" sa barangay San Vicente sa Isla sa Olango sa milabay’ng adlaw.
Ang maong barangay misaulog sa kapistahan sa ilang patron nga si Sr. San Vicente Ferrer nga gisugdan pinaagi sa usa ka fluvial procession.
Si Brgy. Kapitan Cyrus Eyas nalipay sa pagdagsa sa mga namista lakip na sa mga local ug langyaw nga turistang nangabot.
Si Erwin Eyas ang event organizer sa maong festival mipasabot sa mga tigbalita nga gitawag ang maong festival og Baliw-baliw gumikan sa mga ritwal nga binali o sukwahi sa normal nga talan-awon.
Kini sama sa pagsabong sa manok ug iring inay nga pulos manok, pagpaon sa iring sa pagpangisda, hugaw sa baka nga giporma og burger, pagsul-ob og binabaye sa mga lalaki ug ang pagpakita sa kinatawo sa lalaki isip pag-ampo nga dili tapdan og sakit sa kidney o bato ang mga residente sa maong dapit.
Dunay panahon nga ilang gihunong ang maong pista apan pipila ka mga tawo sa ilang dapit ang nangasakit ug kung dunay ihatod nga minatay ini’g pauli dunay laing tawo ang makalay o mamatay.
Tungod sa ilang pagtuo, ilang gibalik ang maong selebrasyon. (BANAT NEWS)