CEBU, Philippines - Gihulagway sa Sugboanong anti-drug crusader ang direktiba ni Justice Secretary Laila De Lima nga pagluib sa mga law enforcers ilabi na sa kapulisan apan nakahatag og tumang kalipay ug pagmaya sa mga drug syndicate.
Gitumbok ni kanhi Paul Clarence Oaminal ang DOJ circular No. 012 nagtugot pag-release niadtong mga sinumbong sa kaso nga naglambigit sa gidiling drugas ilabi na kun ibasura sa piskalya bisan pending pa kini sa review sa kaso.
Matud ni Oaminal gitabunan ni Justice Secretary De Lima ang DOJ Circular No.46 kaniadto ni secretary Simeon Datumanong nga nagpalig-on sa kampanya batok sa gidiling drugas tungod kay gi-obligar niini ang automatic review sa kaso nga naglambigit sa ginadiling drugas sa higayun nga kini mabasura.
Gani ubos sa maong circular ang mabasurang kaso paabton pa kini sa buhatan sa Presidente sa nasud alang sa subling pagtuon ubos sa Administrative order No.253 sa panahon ni kanhi presidente Gloria Arroyo.
Tungod niini gihulagway ni Oaminal nga illogical ang maong DOJ circular ni Secretary De Lima tungod kay dili naman mahimong dakpon og balik ang sinumbong sa kaso sa drugas kun mabakwi ang desisyon atol sa himuong review sa kaso niini.
Matud ni Oaminal nga ubos ning bag-ong direktiba magmaya gyud ang drug syndicates tungod kay sa gamay lang nga sipyat sa law enforcers pagsunod sa rekisitos mabuhian dayon sila. Subay sa gihimong pagtuon ni Oaminal daghang mga kaso sa drugas nga nabasura sa piskalya apan gi-reverse sa gihimong review sa regional state prosecutor ug DOJ. (BANAT NEWS)