CEBU, Philippines - Mikaratil og dagan ang usa ka binilanggo sa Mandaue City Jail human sa hearing niini sa korte sa dakbayan sa Mandaue kagahapon sa buntag.
Ang mieskapo mao si Ricky Andojar, 19, taga Brgy. Binaliw dakbayan sa Sugbu ug dunay kasong robbery ug kalapasan sa paghupot og armas.
Si JO1 Blance Aliño ang tigpamaba sa Mandaue City Jail nagkanayon nga mga alas 10:17 kagahapon sa buntag gikan sa MTC Branch 1 si Andojar alang sa hearing sa kaso niining paghupot og di lisensyadong armas. Apan human sa maong hearing ug padulong nang dad-on sa service van sa Bureau of Jail Management and Penology kalit kining mikaratel og dagan og misakay ug pasaheroan.
Nagdumili usab paghingalan si Aliño kinsa ang jailguard nga gipabantay kang Andojar nga naeskapohan.
Si Andojar nasulod sa Mandaue City Jail niadtong bulan sa Marso gumikan sa kasong robbery diin nakuha usab kaniya ang usa ka armas nga walay lisensiya.
Gimando ni Mandaue City Jail Warden Supt. Jessie Calumpang ang paglusad og subsob nga recovery operation kang Andojar samtang giimbestigar na usab ang escort jailguard niini.
Tungod sa nahitabo gisuspenso usab ang ‘dalaw’ sa tanang mga bilanggo hinungdan sa pagkasurpresa sa mga ‘dalaw’ nga nagpaabot sa gawas sa maong bilanggoan kagahapon. - BANAT NEWS