Helmet law di makapadasig sa kriminal - Aguilos

CEBU, Philippines - Gipanghimakak sa opisyal sa Land Tranpostation Office (LTO) ang katahap nga labing makapadaghan sa mga kriminal nga de motor ang klase sa helmet nga ipasul-ob sa mga magsakay og motorsiklo base sa gimbut-an sa helmet law.

Matud pa ni Regional Director Raul Aguilos nga sa gisitar   nga matang sa helmet nga ipagamit karon sa mga motorista dili bag-o ang iyang hitsura kay mas daghan pa ang mga gipamaligya karon nga mga helmet nga naghinubra kangitngit ang iyang samin kun itandi niining helmet nga gidesenyo sa ipatuman nga helmet law.

Ang nakalahi lang niining klase sa helmet nga ipatuman sugod sa Hulyo 30 ning tuiga mao ang iyang kalidad sa kalig-on sa iyang pagkagama, sumala ni Aguilos.

Kun ang helmet nga kapapitlan na og ICC mark o PS mark, buot ipasabot nga pasado na kini sa gikinahanglang kalig-on nga bisan kun masuhon pa dili magupok, busa luwas ang bagulbagol sa tawo nga magsul-ob niini bisan og bughaon pa og wasay ang iyang helmet.

Matud pa ni Aguilos nga bahin sa giingong makapadasig kini sa mga tulisang de motor ug uban pang mga kriminal, siya miingon nga layo ra kaayo sa kamatuoran ang maong mga katahap sa ubang tigpaniid.

Kay ang mga kriminal kun molihok sa ilang bisyo bisan way helmet o kaha mogamit lang og sako iputos sa ilang dagway, mahimo kaayo nila ang paggama og krimen, matud pa ni Aguilos.

Ang kalidad sa bag-ong klase sa helmet gimonitor   sa Department of Trade and Industry (DTI) 7 ug ang LTO maoy mobantay   sa mga motorista nga motuman sa paggamit ning maong matang sa helmet.

Gipasabot ni Regional Director Arteria Caberte nga ang pagpatuman sa Republic Act 10054 o Motorcycle Helmet Act of 2009 nga nagmando sa tanang drayber ug pasahero sa motorsiklo sa pagsul-ob sa standard protective helmet dili kay balaod lamang dinhi sa nasud kundi balaod kini sa tibuok kalibotan nga gipangunahan sa United Nations.

Sa nasayran ang aktwal nga implementasyon niini pagasugdan na sa Hulyo 30 ning tuiga samtang ang pagpanginspeksyon sa mga drayber sa motorsiklo aron sa pagsuta kung nagsul-ob ba kini sa protective helmet pagasugdan karong umaabot   nga Agusto 1 ning tuiga.

Sa pagkakaron aduna nay nagsugod sa paggamit sa maong helmet kay aduna na may mga tindahan nga namaligya niining helmet nga may PS ug ICC mark dinhi sa Sugbo.

Gitakda usab nga dili lang ang mga tiggamitan og helmet maoy mapahamtangan og silot kun dili lakip usab ang mga dealer ug mga tindahan diin sa ilang paglapas multahan sila og dili muminos og P10,000 apan dili mulapas sa P20,000 alang sa mga namaligya og mga helmet nga walay PS mark ug ICC mark sa BPS. (WC)(BANAT NEWS)