Gipusil sa agtang angol

CEBU, Philippines - Samaran sa agtang  ang  usa ka lalaki  human  kini  pusila sa wala hiilhing kriminal atubangan  sa Kuerks Resto Bar sa  Limbaga Compound, barangay  Kamagayan, dakbayan  sa Sugbo pasado ala-una ang takna  kagahapon  sa kaadlawon.

Ang biktima  mao  si Leonilo Rodrigo, hingkod, ulitawo  nga taga dalan J. Labra, sa barangay  Guadalupe.

Sumala sa kapolisan  sa Guadalupe  nga  nadawat  nila ang alarma  gikan  sa  usa  ka David Casas Labra, 20,  taga  Guadalupe.

Gibutyag  ni  Labra  ngadto  sa mga polis nga sa wala  pa  pusila, ang biktima  nakig-inom kini  kauban  sa iyang  mga barkada unya  may  gikalalis sulod  sa maong  imnanan hinungdan  nga  migawas  ang  biktima.

Apan  dihang migawas  siya  misunod  ang gikalalis  niyang  tawo  kinsa gumikan sa hilabihang kasuko  milanit  sa iyang  armas  de fuego dayon giluthang  ang biktima.

Naigo  sa agtang  ang  biktima  ug  dihang  nahagba  kini  sa yuta,  miikyas  dayon  ang  kriminal.

Gihatod  sa  mga  tinugyanan  sa Emergency Rescue Unit Foundation ang biktima  ngadto  sa Chong Hua Hospital.

Samtang  padayon  pang  gipangita  sa kapolisan  ang kriminal  hangtod  sa pagkakaron. BANAT NEWS