CEBU, Philippines - Gipusposan hangtud nga namatay sa iyaha rang kauban ang usa ka minero tungod sa kasuko nga giilogan niini og higdaanan diha sa ilang gitrabahoang minahan og coal sa bukirang bahin sa barangay Kalagasan lungsod sa Argao niadtong Huwebes sa alas 9:00 sa gabii. Ang biktima mao si Bernabe Langi Vidas, 21, nagpuyo sa maong dapit samtang ang suspek mao si Nixon Alberca, 28, nagpuyo sa maong dapit.
Matud ni PO2 Benjamin Gerozaga sa Argao Police Station dihang nahinabi sa Banat News natulog ang biktima sa luyong bahin sa karenderya dihang miabot ang suspek nga hubog.
Dihang nakit-an sa suspek ang biktima nga maoy naghida sa iyang higdaanan nasuko kini ug mikuha og kahoy dayun gipusposan ang agtang niini tulo ka higayon ug maayong pagkapiyapi sa ulo niini, nadakpan dayon ang suspek. (BANATNEWS)