DTI nagsusi sa mga helmet sa mga tindahan

CEBU, Philippines - Aron sa pagsiguro nga luwas ang pagbiyahe sa mga drayber og motorsiklo ug mga pasahero niini, ang Department of Trade and Industry miawhag sa tanang motorista sa  paggamit na gyud sa standard nga helmet nga adunay markang product standard (PS)  ug Import Commodity Clearance (ICC).

 Matud pa ni Zaide Bation, Chief of Consumer Welfare and Business Regulation Division nga daghan na sila og nainspeksyon nga mga accredited distributor dinhi sa Sugbo.

Daghan pa gyud ang namaligya og helmet nga dili standard apan ilang gipaniguro nga kining mga tigbaligya inanay nga mouli niini ngadto sa kompanya diin nila kini nakuha tungod kay mahimo silang silotan kun hingpit nang maimplimentar ang Republic Act 10054 o Mandatory Helmet Act of 2010 nga ipatuman karong Hulyo 30.

Hinuon dili pa gyud sila makahatag og estimate kung pila ka buok ang mga namaligya og standard nga helmet tungod kay nagpadayon pa karon ang ilang pag-inspeksyon apan aduna na silay lista sa mga kompanya nga legal nga namaligya niini.

Ang giingong mga kompanya nga naninda niini sa tibuok nasud  mao ang DNC Trading, Eastway Racing Company, Fast Road Motorcycle Ent., Honda Cars, Kart Plaza, Kellson Trading, Mworld Trading, Minton Multiresources Inc., Motors Cycles and Scooters Inc., Mybike, Inc., New Fullspeed Marketing,  Philippine SGC Corporation, Roshan Commercial Corporation, Triumph JT Marketing Corporation, Yamaha Motor Philippines Inc., Yohinco Trading, Vicma Marketing Corporation ug usab aduna pay ubang kompanya nga padayong nag-import niining maong standard nga helmet.

Dugang pa ni Bation nga hinuon dili gyud kalikayan nga kadaghanan sa mga motorista magbagulbol tungod kay mokalit na unya og kataas ang presyo niini tungod kay mamahimong ‘in demand’ na kini.

Apan iyang giklaro nga tungod ug alang sa kaayuhan sa tanan kinahanglan gyud nga mogamit sila niining matang sa standard helmet.

Aron sa pagsigurong dili peke o kinopya ang PS marks sa standard nga helmet, kinahanglang makita nila nga ang ubos sa maong logo sa PS mark adunay nakasuwat nga certified product safety o certified product quality samtang sa ICC mark adunay numbers sa ubos sa logo sa ICC mark.

Dili usab kini ordinaryong sticker lang tungod kay kini holographic sticker nga naprinta pinaagi sa electron beam nga nagbilin og high-feature definition nga 500,000 dots per inch ug uban pang security feature nga dili masayonsayon pagkopya sa mga tikasan. - BANAT NEWS