Bacolod City, Philippines — Gilamoy sa usa ka dakong sunog ang 28 ka stalls sa Bacolod City North Public Market sa Burgos St. niadtong Domingo sa kaadlawon nga midanyos og P1.5 milyones.
Si Chief Inspector Pamela Candido sa Bureau of Fire Protection miingon nga 12 sa 28 ka stalls ang hingpit naugdaw samtang ang uban nadanyos lang, wala hinuoy nangasakitan sa hitabo.
Gikatahong diha nagsugod ang sunog sa usa ka kan-anan nga gidudahang tungod sa nag-overheat nga 40-watt fluorescent ballast. Ang mga bombero sa Bacolod Bureau of Fire Protection ug Amity and Chamber fire brigade maoy nagtinabangay sa pagpawong sa kalayo. Si Konsehal Caesar Distrito, nga maoy market committee chairman sa Sangguniang Panglungsod miingon nga nangandam na sila og P4 milyones aron maayom-ayom ang maong merkado. (BANAT NEWS)