Kong. PJ pabor suhol umentohan

CEBU, Philippines - Pabor si Kongresista Pablo John Garcia sa ikatulong distrito sa lalawigan sa Sugbo nga pausbawan ang minimum nga suholan sa mga mamumuo dinhi sa nasud.

Hinuon sa gihangyo sa mga mamumuo nga 125 nga umento, siya mipadayag nga mas maayo nga ang regional tripartite wages and productivity board (RTWPB) ang motuki niini sa angayang kantidad   nga ipausbaw.

Si Kong. PJ kinsa mokandidato sa pagka-gobernador sa lalawigan sa Sugbo sa umaabot nga piniliay miingon nga gusto niya nga ang mga experto lamang ang angay mobutyag sa angay nga umentong   suholan alang sa mga mamumuo niining tuiga.

Kini usab ang dakong hinungdan nga nagdumili siya sa pag-uyon sa tinguha ni Senador Chiz Escudero sa pagpanaway sa RTWPB.

Sigun pa ni Garcia nga kun may kasaypanan man sa mga naglangkob sa RTWPB apan maayo ang katuyoan niini ilabina nga gipaagi na sa matag rehiyon ang pagtuki sa usbaw sa suholan ug labaw sa tanan ang sector sa magpapatigayon, worker sector ug nagkadaiyang ahensiya sa gobiyerno adunay representasyon.

Kahinumdoman nga bag-o pa lamang nga gisaulog sa tibuok nasud ang adlaw alang sa mga mamumuo diin ang isyu na usab sa pagpausbaw sa suholan maoy gituaw sa mga trabahante. (BANAT NEWS)