CEBU, Philippines - Walay lipud -lipod nga gi-endosar ni manlalaban Augusto Go, presidente sa University of Cebu, si Governor Gwendolyn Garcia sa pagka- Senador karong sunod piniliay.
Kini atol sa gipahigayong Induction of Officers sa Boys Scouts of the Philippines Cebu Council nga gitambongan ni Jose Rizal Pangilinan, Secretary General sa Boys Scouts of the Philippines National Council ug uban pang mga kadagkoan niini.
Mitambong usab sa maong kalihokan ang kapin sa usa ka gatos ka mga master scout leader sa tibook lalawigan sa Sugbo.
Matud pa ni Go nga gumikan sa dako nga nahimo sa gobernador ngadto sa kinatibuk-ang Sugboanon , angayan lang kining hatagan og kahigayonan nga makalingkod sa senado aron subli kining makapangalagad dili lang sa Sugbo kundili sa tibuok nasud.
Gihulagway usab ni Go si Garcia nga labing maayong gobernador sa tibuok Pilipinas nga naglingkod ug nag-alagad sa katawhang Sugboanon niining panahona.
Samtang sa bahin sa gobernador gipahayag niini nga mapasigarbohon ug mapasalamaton kaayo siya ngadto sa mga kadagkoan sa Boys Scouts gumikan sa pagtuboy niini kaniya sa pagka -senador.
Nasayran nga si Garcia napili nga Honorary Council Chairman sa Boys Scouts of the Philippines Cebu Council.
Mitambong usab sa maong kalihokan si Mayor Nelson Garcia, ang presidente sa League of Municipalities of the Phils. Cebu Chapter; Mayor Monyen Durano-Streegan sa Sogod; ug si konsehal ug manlalaban Sisinio “Bebs” Andales sa siyudad sa Sugbo. - BANAT NEWS