Barko mitakilid sa dagat

CEBU, Philippines - Gibati og kabalaka ang mga pasahero sa usa ka fast craft dihang mitakilid kini samtang naglawig sa kadagatan gikan sa Pier 1, dakbayan sa Sugbo paingon ngadto sa Getafe, Bohol kagahapon sa hapon.

Si Philippine Coast Guard Central Visayas Station Commander Rolando Punzalan Jr. nagkanayon nga ang Star Craft 5 nga gipanag-iya sa Sea Highway Carrier Incorporated shipping company migikan sa Pier 1 sa Sugbo mga alas 3:30 sa hapon kagahapon ug miabot kini sa tukmang oras nga alas 4:49 sa hapon sa pantalan sa Getafe ug walay kadaot sa mga pasahero.

Gawas niini ang maong fast craft wala molapas sa ilang passenger capacity nga 177 base sa gihimong pakisusi sa PCG.

Si Punzalan nagkanayon nga nakadawat sila og report bahin sa insidente sa alas 4:00 sa hapon.

Hinuon matud ni Punzalan nga sa ilang pasiunang assessment posibleng ang fast craft nag-maneuver kini o miliko hinungdan nga nabantayan nga mitakilid.

Apan matud usab ni Punzalan nga bisan pa niini nagpahigayon gihapon sila og imbestigasyon kabahin sa insidente ug kung may kalapasan nahimo ang maong barko mopadangat sila og report ngadto sa MARINA.  - BANAT NEWS