CEBU, Philippines - Tungod sa pagsaka sa unemployment problem dinhi sa nasud, ang mga kadagkoan sa Technical Education Skills and Development Authority (TESDA-7) milusad ug libreng pagbansay-bansay sa mga wala na magtungha nga walay trabaho. Matud pa ni manlalaban Maria Gloria Tango, Regional Director sa Department of Labor and Employment (DOLE) nga nagkadaghan ang mga walay trabaho karon tungod kay daghan ang mianhi sa Sugbo gikan sa laing lugar sa pagtuo nga ania dinhi ang ilang kapanarbahoan.
Tungod niini ang TESDA mipasalig sa paghatag og maayong training alang sa mga gustong manarbaho ilabi na sa mga bag-ong migraduwar aron sutaon ang ilang kapasidad ug abilidad kung asa sila angayan nga manarbaho.
Midugang si Tango nga tumong sa Tesda mao ang paggiya sa mga job seeker nga mosakar ang ilang kurso ug kaantigohan sa mga panginahanglan sa mga kompaniya nga nagpangita og trabahante
Nakig-alayon usab ang TESDA sa Department of Labor and Employment (DOLE) aron kadtong makahuman na sa training makapangaplay dayon og trabaho pinaagi sa mga job fair nga gipasiugdahan sa DOLE.
Gipaniguro sa TESDA nga ang tanang mopahimus sa ilang training madawat dayon sa ilang aplayan nga trabaho.
Alang kang Tango daghan na kaayong mga walay trabaho nga maayo na ang kahimtang sa ilang pagpuyo karon gumikan sa pagbansay nga napahimuslan nila sa Tesda. Ang ilang skill dako kaayo og ikatabang sa ilang panginabuhi ug sa ekonomiya sa nasud, matud pa ni Tango. - BANAT NEWS