Earth day gipaagi sa bisekleta

CEBU, Philippines - Gatosang mga siklista ang misalmot sa Mass Bicycle Ride kagahapon agi’g pagtamud sa kasaulogan sa Earth Day.

Sumala pa ni Roney Verdida, usa sa nisalmot niining maong kalihokan mahiligon siya sa bisekleta ug nagpasalamat nga dunay susamang mga kalihukan pahinungod sa kalikopan.

Sa laing bahin si Jade Tan, founder sa Bike and Talk Friendship Club nga partisipante usab nagkanayon nga ang ilang grupo nag-umol usab og daghang adbokasiya sama sa feeding programs, paghatag og basurahan sa mga pampublikong eskwelahan karong umaabot nga pag-abli sa klase.

Si Tan sa pagkighinabi sa Banat News miingon nga dungan sa kalihokan kagahapon ang pagpananom nila og mga kahoy sa Olango Island. Ang grupo adunay 600 ka mga miyembro.

Si Vince Cinches ang country coordinator sa 350.Org miingon sa Banat News nga makig-alayon sila sa Department of Education (DepEd) ug Commission on Higher Education (CHED) sa pag-ila sa mga hilit nga lugar aron katabangan kadtong mga estudyante nga maglakaw lamang pipila ka kilometros gikan sa ilang balay paingon sa eskwelahan.

Dugang pa niya nga magpulong-pulong unya sila sa DepEd ug CHED aron kahisgutan ang mahitungod sa ilang adbokasiya alang sa mga magtutungha. Wala hinuon klaruha ni Cinches kung ang buot nilang ihatag nga tabang mao ba ang bisekleta.

Gawas sa kalihukan sa Sugbu, ang ubang bahin sa nasud nga nagselebrar usab sa Earth Day milusad og nagkadaiyang proyekto nga makatabang sa kalikopan ug sagad niini mao ang mga clean up drives. - (BANAT NEWS)