CEBU, Philippines - Patay ang usa ka 21-anyos nga salesclerk ug kritikal ang kahimtang sa 19- anyos niyang uyab dihang nadasmag ang ilang motorsiklo sa gutter daplin sa karsada sa sitio Awayan sa Poblacion 3 siyudad sa Carcar kagahapon sa alas 2:00 sa kaadlawon. Ang patay nang nadangat sa tambalanan mao ang nagmaneho nga si Christine Villamora,21, nagpuyo sa barangay Ocaña sa dakbayan sa Carcar ug salesclerk sa usa ka dakong tindahan sa maong siyudad.
Samtang naangol sab ang iyang angkas nga iyang uyab nga si Hermis Tatoy,19, taga barangay Valladolid. Subay sa inisyal nga imbestigasyon nila ni PO1 Jaffet Saavedra sa Carcar City Police dihang nahinabi sa Banat News gikan sa barangay Perrelos ang duha gikan nanan-aw og concert ug paingon nang mamauli dihang nadisgrasya.
Matud pa wala makontrolar ni Villamora ang manobela ug natagak sa gutter hinungdan sa pagdungan nila og kalagpot ug mitugpa sa sementadong dalan.
Ang duha gidala sa Carcar City District Hospital apan si Villamora gideklarar nga dead on arrival samtang si Tatoy gilahos og hatud sa tambalanan dinhi sa dakbayan sa Sugbo tungod sa seryoso nga kahimtang. (BANAT NEWS)