Demolisyon wa ihinayon hangtud dili magkaklarohay-Judge Peras

CEBU, Philippines - Nahuwasan ang 168 ka pamilya kagahapon sa sitio San Miguel, barangay Apas human gimando ni Regional Trial Court Judge Soliver Peras nga dili una idayon ang demolisyon sa maong dapit gumikan kay daghan pa nga mga isyu angay tagaan og katin-awan.

Ang korte mimando sa mga duha ka kampo sa pagpresenta sa ilang mga argumento ilabi na ang kasamtangang Urban Development and Housing Act (UDHA) o Republic Act 7279 diin kinahanglang dunay relocation site nga gidalit sa mga tawo nga maapektohan sa demolisyon.

Ang kagamhanan sa siyudad sa Sugbo gihatagan usab og higayon nga makapresenta og dokumento nga maong dapit gipaubos sa Urban Land Reform aron makapahimulos kini sa specialized housing program sa kagamhanan.

Mopahigayon una og oral argument ang duha ka kampo ugma sa hapon aron matuki ang mga isyu ilabi na sa UDHA Law. Gihatagan usab kutob ugmang adlawa aron makasumitir og position paper ang duha ka kampo.

Si Mayor Michael Rama mimando na sa Division for the Welfare of the Urban Poor (DWUP) aron sa pag-asikaso niini aron magpabilin ang mga residente sa ilang mga dapit.

Kahinumduman nga nagbaha ang mga opisyales sa siyudad ang misimpatiya sa mga tawo apan wala kalikaying ang mga opisyales daw nagpatas-anay sa ilang kaugalingon atubangan sa mga apektadong pamilya tungod sa ilang pagsimpatiya.

“Pamolitika ba? Kung dili magpakita ang mayor, pangitaon ang mayor. Unya kung naa, kuwestiyunon dayon ‘ta kung nganong naa ‘ta. Dili sila magpataka og estorya,” sumala pa ni Rama.

Ang nahisgutan nga dapit dunay gidak-on nga 4.6 nga ektarya gipanag-iya ni Mariano Godinez kinsa padayon karon nga nagtinguhang mabalik kanila ang maong luna. - Sanden J. Anadia/EIM (BANATNEWS)