CEBU, Philippines - Ang kagamhanan sa probinsya sa Sugbu miumol og ordinansa nga himoong Semana sa Pinulongang Binisaya ang katapusang semana sa buwan sa Pebrero matag tuig.
Ang maong ordinansa gi-endosar ni 1st district board member Julian B. Daan, kinsa nagkanayon nga ang maong ordinansa mao unya ang sukdanan aron kahatagan og importansya ang pinulongang Binisaya.
Ang maong ordinansa nag-ulohan og “Kasuguan Nga Nagtakda sa Katapusang Semana sa Bulan sa Pebrero Sa Matag Tuig nga Semana sa Pinulongang Sugbuanong Bisaya”.
Matud ni Daan ang maong ordinansa gitumong aron magpakabana ang katawhan sa pagtahod sa atong adunahang kultura.
Sa pagkakaron nahimo nalang sama sa usa ka hugaw nga wala na tagda sa ubang Sugboanon ang pinulongang Binisaya, matud pa ni Daan.
Samtang si 2nd district board member John Calderon mibutyag usab nga gikinahanglan nga hatagan og gibug-aton ang maong ordinansa aron nga kahatagan kini og bili sa tanang katawhan.
Gi-awhag usab ni board member Alex Binghay ang kalungsoran ug kabarangayan nga unta mosalmot sa gi-endosar nga ordinansa aron ang pinulongang Binisaya dili mawala sa atong kultura.
Napanglantawan usab ni board member Arleigh Sitoy nga gikinahanglan unta nga gahinan gayud og dakong pundo ang maong ordinansa alang sa mga posibling mga kalihokan sa matag kasaulogan niini aron kanunay kining mahinumdoman sa katawhan. (BANATNEWS)