Gihimong pundasyon sa condominium nahulpa

CEBU, Philippines - Napulo ka panimalay ang diriyot mahugno human kalit nga nahulpa ang yuta sa gitukod nga Horizon 101 sa sitio Santa Teresita kanhi sitio Taup, barangay Cogon Ramos, dakbayan sa Sugbo.

Ang maong insidente nahitabo kagahapon sa ala 1:30 sa hapon hinuon walay gikatahong naangol niini tungod kay nakabantay man ang mga residente sa lugar ug nanagan palayo dihang nagsugod og pangliki ang yuta.

Ang tulo sa napulo ka mga residente nga direktang naapektohan mao si Fely Pachico, 61-anyos diin ang balay niini nga gama sa gaay nga materyal ang nabungkag, Lean Rafael Alviola, 22 ug Ramon Pressilas. Gawas sa tulo laing pito usab ka mga residente ang pabakwiton aron malikay sa disgrasya inabagan sa Special Weapon and Tactics (SWAT).

Ang maong construction site wala pay edipisyo nga natukod niini diin padayon pa ang excavation o pagkubkub sa yuta diha sa lugar aron butangan sa pundasyon.

Si Alvin Santillan, executive director sa Cebu City Risk Reduction Management Council nagkanayon nga kinahanglang pabakwiton ang mga residente duol sa nahulpang yuta.

Gibanabanang tulo ngadto sa upat ka andana ang gihabugon o gilawmon sa maong gikabkab nga yutang nahulpa kilid sa kabalayan.

Ang kagamhanan sa Sugbo nagpahigayon og imbestigasyon kabahin sa hinungdan sa pagkahulpa sa yuta ug mipadala na og mga engineers ug opisyales sa Office of the Building Official.

Si Mayor Michael Rama miluwat dayon og ceased and deceased order ngadto sa Horizon aron hunongon una ang ilang pagtrabaho sa maong lugar. Brenda D. Batuto ug Ryan Christopher J. Sorote sa The Freeman/EIM (BANAT NEWS)