CEBU, Philippines - Mikapin sa P30 mil ang kantidad sa kuwarta ug cellphone nga nasakiyo sa mga tulisan gikan sa usa ka Indian national nga ilang gitulis didto sa barangay Dumlog, dakbayan sa Talisay sa miaging hapon.
Ang biktimang si Saby Singh, 32, minyo, residente sa maong barangay daling mi-report sa kapolisan sa maong hitabo.
Sa imbestigasyon sa kapolisan nga gihimo nasuta nga si Singh naningil sa nakautang kaniya sa maong dapit dihang kalit lang mihunong sa iyang atubangan ang usa ka motorsiklo nga gisakyan sa duha ka wala hiilhing mga lalaki.
Dayon ang angkas niini sa luyo nanaog ug dungan sa pagtion sa iyang armas de fuego sa biktima mideklarar kini nga tulis.
Tungod sa kakalit wala makalihok ang biktima ug sayon ra kaayong gikuha sa tulisan ang bag sa biktima nga gisudlan sa P27 mil nga kuwarta nga iyang koleksyon ug Nokia CS nga cell phone nga nagkantidad og P6,000.
Human makuha ang kuwarta ug cell phone misirit dayon pahilayo sa maong lugar ang mga tulisan.
Padayon pang gipangita sa kapolisan ang maong mga tulisan karon. - BANAT NEWS