CEBU, Philippines - Nadakpan sa kapolisan sa dakbayan sa Mandaue ang dugay na nilang gipangita nga suspetsadong tulisan sa maong dakbayan, didto sa hideout niini sa barangay Dawis, dakbayan sa Talisay kagahapon.
Ang nadakpan mao si Chukie Layco, 25, ulitawo nga taga barangay Casili, sa lungsod sa Consolacion.
Ang maong suspetsado gitumbok nga kauban sa mga tulisan nga sakop sa grupo ni Arnel Poras kinsa unang nadakpan sa kapolisan.
Si PO1 Jerson Entice sa Investigation Detection and Management Bureau (IDMB) mibutyag sa Banat News nga unang gilambigit ang maong suspetsado sa mga kauban niini nga ilang nadakpan kinsa nagtingkagol na karon sa bilanggoan.
Sayo niini nadakpan sa kapolisan si Arnel Poras nga taga lungsod sa Consolacion kinsa maoy gitumbok nga lider sa grupo, ug gisunod usab ang pagsikop sa iyang ubang mga sakop. Dugang pa ni PO1 Entice nga giila usab ni Poras si Layco nga maoy usa sa ilang mga kauban nga magsakay og motorsiklo nga tigpanulis sa dakbayan sa Mandaue, Consolacion ug sa dakbayan sa Talisay. Matud pa ni PO1 Entice nga ang pipila ka mga biktima nga ilang gipatan-aw sa mga tulisang nadakpan positibo nga miila niini nga maoy mitulis kanila.
Midugang si Entice nga gipaabot pa nila nga motug-an pa og dugang kasayoran si Poras bahin sa ilang pagkatulisan ug ingon man sa uban pang mga kauban niini.
Bisan pa niini nagpadayon pa ang kapolisan sa pagsulbad sa mga tulis nga mugna sa mga tawong magsakay og motorsiklo nga dili kauban ni Poras. (BANAT NEWS)