PCG andam na sa semana santa

CEBU, Philippines - Gilauman ang pagdasok sa mga pasahero karong mga mosunod nga mga adlaw sa pagsaulog sa Semana Santa sa sunod semana.

Si Philippine Coast Guard (PCG) Central Visayas Station Commander Rolando Punzalan Jr. sa pakighinabi niini sa Banat News kagahapon nagkanayon nga nangandam na sila sa maong sitwasyon.

Sugod niadtong Huwebes ang PCG nagbutang og mga passengers assistance center diha sa pier 1, 2 ug 3 tumong niini nga ang mga pasahero dunay maduolan kung duna silay mga pangutana o problema sa ilang pagbiyahe.

Gibutyag ni Punzalan nga niadtong tuig 2009 base sa ilang talaan dunay 156, 552 ka mga pasahero ang mibiyahe gawas sa Sugbo, 157, 719 ka pasahero sa tuig 2010 ug 169,945 sa milabay’ng tuig.

Niining tuiga gilauman sa PCG nga modaghan pa ang mga pasahero nga mobiyahe gawas sa Sugbo, higpit usab nga gibantayan sa PCG ang mga barko aron malikayan ang overloading.

Ang pag-overloading o pagpasakay og sobrang pasahero maoy usa sa hinungdan sa disgrasya diha sa kadagatan sumala pa sa PCG.

Si Punzalan nagkanayon nga ang mga shipping company nakig-ayuda na ngadto kanila ug nagpahigayon og initiative sama sa pagbutang og x-ray machines alang sa seguridad sa ilang mga pasahero.

Ang kapolisan ug kasundalohan gipakatap na usab diha sa pantalan ug nagkadaiyang mga bus terminal aron motabang sa pagbantay. (/EIM) (BANATNEWS)