P300 mil payroll money natulis

CEBU, Philippines - Mikabat sa P300 mil ang kantidad sa salapi ug mga alahas ang nasakiyo sa mga tulisang miatake sa buhatan sa usa ka janitorial services sa barangay Subangdaku, dakbayan sa Mandaue sa miaging hapon.

Si PO3 Marino Lufranco sa Investigation Detection and Management Bureau (IDMB) miila sa biktima nga mao si Josephine Las Marias Butcon, 43, nga maoy tag-iya ug tagdumala sa Exel Manpower Technology and Janitorial Services, Inc.(EMTJSI).

Matud pa ni PO3 Lufranco nga si Butcon miasoy ngadto kanila nga didto siya sa sulod sa iyang buhatan uban sa tulo pa niya ka mga office staff dihang may mituktok sa pultahan nga usa ka tawong nag-bonet. Dihang giablihan na ni Butcon ang pultahan maoy iyang nasugatan ang sumbohan sa armas nga kalibre 38 nga gition kaniya sa tulisan uban sa pagdeklarar nga tulis.

Si PO3 Lufranco midugang nga wala na makalihok sa kakuyaw ang biktima ilabi na dihang misunod usab pagsulod ang laing tulisan nga nagdala og kutsilyo nga maoy misakmit sa iyang shoulder bag    nga may sulod nga P250 mil nga payroll money, bracelet nga balor og P20, 000, kuwentas nga bulawan, ariyos ug cellphone.

Human masakmit ang maong mga butang misakay dayon ang duha ka tulisan sa usa ka motorsiklo nga nagpaabot kanila sa gawas dayong sirit pahilayo sa maong lugar.

Matud pa ni PO3 Lufranco   nga maglisud sila pag-ila sa mga tulisan kay ang buhatan nga gitulis   walay CCTV camera ug wala usay security guard nga nagbantay niini apan padayon sila sa pagpangita sa maong mga tulisan. (BANATNEWS)