Mag-ampo aron di ungoon - Binghay

CEBU, Philippines - Pagtuo, pagsalig ug pag-ampo maoy gikinahanglan sa katawhan aron malikayan ang mga kahadlok   bahin sa mga balita nga adunay ungo nga namugno ug tawo dinhi sa Sugbo, matud pa ni Msgr. Esteban Binghay ang Episcopal Vicar sa Archdioceses of Cebu. Si Msgr. Binghay, mibutyag nga ang mga estorya nga napatik sa Banat News komon kaayong mogawas sa panahon nga magkaduol ang Semana Santa.

Matud pa ni Binghay nga kasagarasn sa mga estoryang ingon niini mugna lang sa hunahuhna sa tawo, apan dili siya motuo nga ang ungo manakod og laing tawo.

Dugang pa ni Binghay nga kun aduna man gani manakod dili na siya binuhat sa Labaw’ng Makagagahom kun dili usa kini ka giingong demonyo.

“Pero dunay demonyo nga motakod sa tawo, siguro gyud na, pero dili tawo nga mamugno og tawo, murag psychopathic nana,” sumala pa ni Binghay.

Mipasabot si Binghay nga ang mga nabaniog nga estorya usa lang ka ‘external expression’ diin ilang nakita ug ilang masulti.

“Ang ilang external expressions, appearances, what they saw, unsa ilang nakita, mao rasad na ilang isulti, mao na nga makatag na” matud pa ni Binghay. Midugang si Binghay nga duha ra ang kapilian sa tawo tali sa Demonyo ug Ginoo, ug labing maayo nga magpa-Ginoo gyud ang tawo, miingon  siya. Gipahimangno ni Binghay sa katawhan nga nakadungog sa pagkatap sa taho bahin sa giingong ungo sa lungsod sa Sibonga ug Argao nga kinahanglang “paduol gyud ta sa Ginoo, adto gyud ta sa simabahan ug mosalig gyud ta sa iyang gahom”.

Sa nasayran hilabihan na kabaniog sa bukirang bahin sa lungsod sa Argao ug Sibonga nga adunay gipangbugno sa ungo sa maong mga lugar.  - BANAT NEWS