Kusinero gi-hostage sa kauban

CEBU, Philippines - Mihutlay sa kahadlok ang 60-anyos nga kusinero kinsa gi-hostage pag-unay sa kauban niya sa trabaho ug abison unta sa sundang niini ang iyang liog   sulod sa ilang barko nga nagpundo sa MV Cabahug Shipyard sa barangay Opao, dakbayan sa Mandaue kagahapon sa alas 10:00 sa buntag.

Ang gi-hostage mao si Mauricio Amorte, 60, minyo, lumad nga taga dakbayan sa Bacolod, ug kusinero sa M/V Juster nga gipanag-iya sa Jose M. Barrientos Shipping.

Samtang ang suspetsadong mi-hostage kaniya mao si Gary Pevidal, 30 , minyo, lumad nga taga Isla Verde sa Batangas City ug kaubang tripulante sa biktima.

Si Sr. Insp. Estephane Amamag-id, hepe sa kapolisan sa Presinto 5 sa Mandaue City Police Office (MCPO) miingon nga dihang ilang nadawat ang maong alarma nangayo dayon sila og panabang sa mga sakop sa intelligence divison ug sa mga sakop sa Special Weapons and Tactics (SWAT) team.

Dugang pa niya nga si Sr. Insp. Mitchelle Gabod, hepe sa womens division sa MCPO lakip usab nga mitubag sa maong alarma kinsa maoy nagsilbeng negotiator ngadto sa suspetsado.

Matud pa ni Amamag-id nga nadawat nila ang maong alarma gikan sa mga kauban sa biktima ug suspetsado   kinsa walay nahimo sa pagpakgang sa maong hitabo.

Si Sr. Insp. Amamag-id miingon nga gidala sa suspetsado ang biktima didto sa likod nga bahin sa barko ug didto gitionan ang liog niini sa hait kaayo niyang   sundang aron abison.

Samtang   gibad-ay niini ang suwab sa iyang sundang sa liog sa biktima, nagpaninggit kini nga nagkinahanglan siya og barko nga iyang kasakyan paingon ngadto sa Batangas City.

Mihulga kini nga gawas lang kun makasakay siya sa barko, maluwas ang biktima ug dili niya kini putlan sa liog nga maoy nakapakurog sa hilabihang kalisang ni Amorte.

Sa pag-abot ni Sr. Insp Gabod didto sa barko ug nakita niya ang eksena, wala siya’y laing gihimo gawas sa paghangyo ug pag-am-am sa suspetsado.

Gisukit kun unsay iyang problema, ug mitug-an usab ang suspetsado nga gusto na siyang mopauli sa Batangas City ug nagkinahanglan siya og barkong kasakyan paingon didto. Gibutyag niini nga kundili siya makasakay og barko, iya gyung hunosan sa kinabuhi ang biktima.

Samtang nagpadayon ang pag-am-am ni Sr. Insp. Gabod, mihinay-hinay usab kini pagduol sa nahimutangan sa suspetsado.

Dihang nalingaw ang suspetsado sa pakighinabi sa policewoman kalit nga gilayog niini ang suspetsado ug nailog ang sundang nga gition niini sa liog sa biktima ug dayon gisikop kini.

Sa pakisusi nga gihimo sa kapolisan ilang nasayran nga ang suspetsado kanunay lang maghubog matag adlaw.

Malagmit gimingaw siguro sa iyang pamilya  sa Batangas City tungod kay dugay-dugay na silang natanggong sa dakbayan sa Mandaue kay gibaradero ang ilang barko sa maong lugar.

Matud pa ni Amamag-id nga ilang gidala sa Mandaue City District Hospital ang 60-anyos nga biktima tungod kay hilabihan ang pagsaka sa dugo niini ug ang suspetsado kasamtangang gibalhog sa detention cell sa Opao Police Station alang sa tukmang lakang nga ilang himoon niini.  - BANAT NEWS