Polis nga miguba sa patrol car imbestigahon

CEBU, Philippines - Gipaubos sa imbestigasyon ang usa ka police officer kinsa mipadasmag sa patrol car nga iyang gimaneho sa dakong bato didto sa barangay   Molobolo sa lungsod sa Tuburan niadtong miaging udto.

Si manlalaban Julius Ompad, deputy chief sa Provincial Investigation and Detective Management Branch (PIDMB), maoy gitahasan sa pag-imbestigar kang PO1 Mohaliden Samod, sakop sa warrant subpoena server sa Tuburan Police Station.

Si Samod naghatud og subpoena dala ang   Innova patrol car sa ilang buhatan nga nagtangag sa plate number nga JEH-489 dihang gidasmag niya kini sa bato daplin sa karsada.

Ang maong subpoena giingong isilbi unta niya kang Jovency Lucanas aron sa bista sa kasong frustrated murder unya sa    May 4, 2012

Si Samod miingon nga ang lugar nga iyang gisudlan daghan kaayong mga tawo daplin sa karsada sa maong higayon.

Hinungdan nga nag-aginod ang iyang sakyanan  ug gilihay-lihayan nila ang labo sa bagang tawo sa maong barangay.

Unya matud niya nga sa tanto niyang lihay-lihay adunay bata nga kalit lang nga milabang ug wala niya damha nga aduna pay laing bata nga nagsunod kinsa nagdagan nga milabang usab sa karsada.

Busa gumikan sa kakalit ang iyang gihimo aron dili maigo ang bata mao ang paglubag sa manobela sa sakyanan apan nadusmo ang simod niini sa dakong bato busa    naguba ang bumper sa maong sakyanan.

Matud ni Samod nga andam siyang moatubang sa imbestigasyon nga himuon sa PIDMB batok kaniya sanglit wala man usab niya tuyoa ang maong pagdasmag.

Gumikan sa maong hitabo si Ompad nagkanayon nga bisan kun nadisgrasya ang sakyanan sa oras sa trabaho imbistigahon gayud kini aron tumanon ang standard operating procedure sa kapolisan.

Midugang si Ompad nga pinaagi sa imbistigasyon masuta usab kun aduna bay tulobagon nga administrative liability o wala si Samod. (Rey B. Pasaporte/WC) (BANAT)