3 kahera sa usa ka tambalanan gikiha
CEBU, Philippines - Kasong qualified theft maoy giatubang sa tulo ka trabahante sa Cebu Puereculture and Maternity House Incorporated human giingong nakadispalko og kapin usa ka milyon.
Ang gipasakaan sa nahisgutang kaso mao silang Marilou Amaca nga usa ka reliever cashier; Noemi Gabuya nga kanhi cashier ug na-promoted na ngadto sa pagka senior bookkeeper ug Madiel Santillan nga usa ka regular cashier.
Ang tulo kanhi nagtrabaho sa nahisgutang establisemento apan nataktak human madiskubrehi ang anomaliya.
Base sa complaint affidavit sa CPCMHI nga girepresentahan sa ilang chief accountant nga si Marilou Araco, ang tulo maoy nadestino sa pagdawat, paghimo og resibo ug mo-tally sa mga halin sa ilang hospital.
Apan gikatingala nalang ni Araco tungod kay nianang buwan sa Hulyo sa miaging tuig dili na maabot sa iyang lamesa ang mga resibo nga iya untang i-check subay sa palisiya.
Tungod niini, personal nga giihap ni Araco ang ilang halin ug siya usab ang mideposito niini sa bangko. Gani, iya usab nga gihangyo ang ilang accountant nga si Emily Ramos nga ipasusi sa bangko ang ilang account.
Apan nakurat nalang si Araco tungod kay wala diay gideposit ang kwarta nga nagkantidad og P1,396,011.67.
“It was then that I uncovered that funds and cash received a week before were not deposited. Also, there was what is known as "lapping"---- funds supposed to be deposited on actual date appeared in the bank statements as having deposited on later dates. We found out a difference of P 1,396,011.67,” tipik sa affidavit ni Araco.
Bisan paman gitaktak na ang tulo sa CPCMHI gipasakaan gihapon sila og kaso. Sila si Gabuya ug Santillan miduso unta og motion for reconsideration apan gibasura kini ni City Prosecutor Maria Teresa Calibogan Casiño. Ang piskalya wala usab morekomendar og piyansa sa tulo. (BANATNEWS)
- Latest
- Trending
